姜濤 在《2021年度叱咤樂壇流行榜頒獎典禮》蟬聯「我最喜愛的男歌手」，又憑《Dear My Friend,》奪得「我最喜愛的歌曲」，他今日到商台節目《叱咤樂壇》接受謝茜嘉訪問，問到如何慶祝，姜濤說：「 完咗頒獎典禮，第二日就係MIRROR MV嘅拍攝日，嗰日難得食足三餐，我當慶祝咗！平日會計住計住，嗰日花姐都覺得我好誇張，對我嚟講，人生除咗音樂之外，第二重要嘅係食嘢。」
姜濤蟬聯「我最喜愛的男歌手」，他說：「 完咗頒獎典禮，第二日係MIRROR MV嘅拍攝日，嗰日難得食足三餐，我當慶祝咗！」 姜濤今日到商台節目《叱咤樂壇》接受謝茜嘉訪問。 之後姜濤親述第9胎《鏡中鏡 》誕生過程，他說：「其實入咗行冇耐，就漸漸擔心日後嘅路，除咗可愛或者得意形象之外，我仲有好多面未俾大家睇到，尤其是過去呢一年，慢慢質疑自己，因為外界都有好多質疑，尢其是上年攞咗『我最喜愛的男歌手』之後，更加多外界質疑，連自己都開始懷疑自己，到底我有乜嘢可以俾到觀眾呢？上年年頭，情緒一度好差，外界嘅聲音啦，自己內心對自己嘅聲音，身邊又發生好多事情，令自己覺得好似唔知自己做緊啲咩，我第一步解決嘅問題係，希望將真實嘅自己話俾大家聽，我係個咩人，將呢個攞出嚟之後，無論大家鍾意唔鍾意都好，起碼自己問心無愧！」
姜濤親述第9胎《鏡中鏡》誕生過程。 姜濤指《Master Class》這首歌是一種反擊：「其實由年頭做咗《Master Class》之後，呢首歌係講反抗同反擊，比較衝動去做呢首歌，呢隻亦係攞完『我最喜愛的男歌手』之後出嘅第一首歌，有少少衝動同埋唔成熟，因為有太多個人嘅情緒，本身《鏡中鏡》呢首歌本來諗住喺《Master Class》出咗之後第二首歌，但當時冇咁完整嘅概念，因為想用更強硬嘅字眼去攻擊人，攻擊番攻擊我嘅人，第一想解釋，第二想反擊，冇咗第三共存嘅階段、其實《鏡中鏡》仲有一個階段係，係希望同呢啲嘢去共存，經過一年之後發覺，呢啲嘢係無止境，所有嘅聲音咩都好，只要你喺呢行就一定受到質疑，呢個係必然，所以你冇辦法同大家對抗，不如嘗試帶住呢啲聲音行落去！」
《鏡中鏡》MV。 謝茜嘉問：「你最介意人哋話你咩？」姜濤話：「冇話最介意人哋話乜嘢，話乜嘢都有，會話：『你成日拍咁多廣告，你都唔係歌手嚟嘅！』類似種種嘅聲音都會令自己開始質疑自己，好彩後來內心另一個自己同自己講：『你冷靜啲先，一定仲有解決嘅方法！」姜濤之後寫了千字文給填詞人小克，訴說自己的感受：「嗰排有睇小克嘅書，都了解到小克老師嘅詞，佢所描述嘅嘢唔單只係市面上情歌咁簡單，佢可能係追尋緊人生更加多嘅意義，佢厲害到會解釋埋宇宙嘅定義，其實人生仲有好多事情去發掘，唔需要停留喺呢啲咁小嘅事情入面，所以我睇咗個本書之後，就覺得下一隻歌就搵佢寫。」他又說：「 呢隻歌雖然話係答案，準確啲來講係俾咗方向，唔會出咗呢隻歌之後，大家嘅抨擊會停止，但要自己內心嘅聲音嘗試同佢哋共存，我再次面對呢啲聲音嘅時候到，都會一笑置之！」
姜濤之後寫了千字文給填詞人小克，訴說自己的感受。 小克的書牽涉很多因果、前世今生，問姜濤相不相信前世今生，他說：「 我以前唔信嘅，但最近都研究好多佛學嘅嘢，自己無啦啦會睇吓《莊子》、《老子》，所有一切嘅嘢，因為人與人之間都有一種緣份，我今日行到呢一步，都唔係淨係靠自己嘅努力，冥冥中都有啲力量幫我。我都好想知我前世係咩，其實我喺呢一世都有好多莫名其妙嘅記憶，唔知點解我心目中有個密碼，我所有嘅銀行帳戶都係用呢個Password，但嗰個密碼唔係有意義，唔係我嘅生日，我估係前世用開嘅密碼，真係好神奇！」
姜濤很想知自己的前世是甚麼。 現在如何看藝人這身份呢？「三年後我覺得對artist有更加多嘅責任，不但喺唱歌方面邊，你嘅生活都要帶俾人哋更加多嘅訊息，例如其實我哋嘅粉絲一直以來幫我哋做好多善事，我哋當然都呼籲粉絲做善事，但我哋本身都要做多啲善事，我都有同花姐講話嚟緊俾我默默地去試吓做義工，希望用自己嘅力量去影響更多人！」
至於人生目標，他說：「之前話25歲退休誇張咗，依家冇話諗住幾多歲退休，一切順其自然，人生冇話一定嘅，可能下年，講笑，其實依家嘅我唔夠膽講有咩追求，我希望我嘅價值係離開呢行之後，大家覺得姜濤係一個幾好嘅藝人，希望離開嘅時候，大家記得我係姜濤，唔係姜B！」
監製Edward Chan大讚有親和力
今年奪得「叱咤樂壇監製大獎」的Edward Chan， 由姜濤第1胎《一號種籽》到第9《鏡中鏡》都有份監製，對姜濤有一定了解，Edward Chan昨日接受同一節目訪問。 今年奪得「叱咤樂壇監製大獎」的Edward Chan， 由姜濤第1胎《一號種籽》到第9《鏡中鏡》都有份監製，對姜濤有一定了解，Edward Chan昨日接受同一節目訪問，就大讚姜濤是一個好特別的藝人，而且很成熟：「好似 《Dear my friend,》呢件事，我係知個不幸，佢本來要錄音，但佢經理人通知錄唔到，一路我都唔知咩事，後來佢返嚟錄音都冇講過，好成熟咁處理。喺個部分完結嘅時候，佢就同我講想做首歌送俾朋友，佢問我好唔好，我話諗吓先，後來我哋擺低咗呢件事，但係大家感覺都係不如都做啦，我嘗試幫佢搵旋律，冇Official confirm過做，我之後send咗啲旋律俾佢聽，姜濤話幾好喎，不如就講呢個topic啦，好自然咁做咗出嚟，我會感覺到喺呢件事上面，佢處理緊個傷痛，係一個好成熟嘅做法，我覺得以一個二十幾歲嘅後生仔來講好難得！」
監製Edward Chan大讚姜濤有親和力。 Edward又說：「其實阿姜都幾容易捉嘅，佢唔會修飾自己嘅情緒，但佢會好專業咁完成佢要完成嘅嘢。」謝茜嘉問：「作為監製嘅你有冇俾人姜濤電過？」Edward說：「其實佢確實好吸引人，佢嘅吸引來自佢嘅親和力，我覺得佢入面好大，佢藏咗好多嘢，佢有好強烈嘅親和力，我嘅family ，佢有時會喺studio見到，佢會對佢哋好好，而我嘅family覺得佢好吸引，想同佢傾偈，佢都好好。喺演藝方面，佢好清楚自己想點，同一時間佢好有決心去做嗰件事，你只會想盡自己嘅能力，幫佢達成心目中嗰件事。」
