Tiger（邱傲然）今年22歲，是人氣男團MIRROR 最小的成員，他2018年參加《全民造星》，因跳拉丁舞而令人留下深刻印象，雖然最後30強止步，但仍被花姐邀請加入MIRROR。Tiger除了識跳拉丁舞，亦自小習武術、打Golf，多才多藝，2019年更創立自家服飾品牌「dézert」，一嘗做老闆滋味！最近他接受美國華語節目《偶像名人堂》越洋訪問，Tiger坦言雖然是團中最小成員，但不會特別受寵愛：「我係最細個，但其實我哋比較似朋友，而唔係哥哥同細佬嘅關係，但佢哋始終經驗多啲，做多我幾年人，去到某啲話題可以俾多啲意見我，但平時生活上嘅相處比較似朋友，你有你講，我有我講，大家係equal嘅！」

Tiger十歲開始學拉丁舞，他大爆當初學舞是因為妹妹：「拉丁舞呢個圈子始終男仔比較少，女仔跳舞比較多，我個妹學拉丁舞嘅，有一次我接妹妹落堂，個教練見到我就話原來你有哥哥嘅，男仔嚟喎，不如下堂叫我一齊上，我從此就俾佢拉咗入去跳拉丁舞！」

花姐經常說Tiger是隱形人，很低調，主持問他有沒有想過單飛或其他發展，Tiger坦白說：「其實喺以前，我真係冇自己要出單曲同單飛嘅概念，點解呢？以前我覺得可能興趣未咁大，我唔知呀，依家我見Lokman（楊樂文）同AK（江𤒹生）啲合唱歌，原來好有型，呢件事好好玩喎，我就會想如果我有一首歌，可以同兄弟去合唱，做一啲project出嚟，其實都係一件好過癮嘅事，所以我依家有呢個諗法，不如同唔同嘅兄弟出唔同嘅歌，玩唔同嘅曲風，咁就好啦！除咗音樂上面，其實我最想就係接觸多啲戲劇，無論係劇集或電影方面，如果有就非常好啦！」

Tiger是浸大電影學院高級文憑畢業生，曾經擔任MIRROR第三首單曲《破鏡》的MV導演：「當時我只係19歲，花姐說：『MIRROR出歌，你做MV導演啦！』嗰陣時其實我係好驚嘅，我覺得好大壓力，好大責任， 11個兄弟嘅MV關我事，平時有咩我都會問Lokman，戲劇上嘅嘢我會問佢，嗰排我大壓力到成日約Lokman食飯：『我請你食飯啦，你陪我出嚟傾偈！』我不斷問佢，你覺得點樣會好啲，Lokman同我講：『有準備就唔使驚啦，最緊要你有準備啫！』」

Tiger經常提及Lokman，他搞笑說連小虎隊（Tiger粉絲名稱）都以為他暗戀隊長：「我點解成日提到Lokman，其實我係不知不覺，唔係專登嘅，我覺得佢係一個好叻嘅人，我已經成日講Lokman，講到啲粉絲話我暗戀佢，我講得好多，你明唔明？但係冇辦法，我覺得佢一個天才，你擺佢係咩崗位，佢都可以好妥妥當當做足100分，而你係估唔到佢會做到一百分，而去到一啲好危急嘅關頭，好似有記者問一啲好尖銳嘅問題，佢第一個企出嚟：『我係大哥，我幫你頂！』其實我非常之欣賞佢！」

Tiger欣賞Lokman的程度，去到連自己創立的自家服飾品牌「dézert」，都和Lokman一起搞：「 我屋企本身從事製衣行業，所以我入咗行之後，覺得其實可以試吓搞賣衫嘅牌子，好似幾一條龍幾啱喎，跟住就開始做，一開頭我將自己好鍾意嘅元素擺入去，同屋企人講呀，想點樣整，到依家Lokman同Alton（王智德）已經係一齊handle呢個牌子，我哋三個一齊擁有呢個牌子，因為佢哋接觸好多街舞同街頭文化，令到呢個牌子，某程度上有嘅嘢更加多更加豐富！」